Santiago de Compostela

Santiago de Compostela, capital da Comunidade Autónoma de Galicia; unha cidade declarada Patrimonio da Humanidade pola UNESCO grazas á súa beleza monumental, extraordinaria conservación e por ser meta dunha milenaria ruta de peregrinación: o Camiño de Santiago, que desde o século IX transformou esta paraxe do ‘finis terrae’ en punto de encontro da fe e do pensamento do mundo occidental.

Compostela é unha aparición de pedra ancorada entre os verdes bosques do noroeste español e as veciñas rías galegas. Comezou por ser lugar de paso xunto a unha vía romana, pero o descubrimento da tumba do Apóstolo Santiago a principios do século IX fixo xurdir un lugar de culto nos confíns dunha península nese tempo dominada pola invasión musulmá. Desde entón toda Europa botouse a andar cara a Santiago, cidade santa da cristiandade na que lles esperaba a graza da absolución plenaria. Alí emerxeu unha catedral románica á que o transcurso dos séculos quixo engadir a sobriedade do Renacemento e a magnificencia dun Barroco que terminou por trazar a imaxe monumental da urbe, feita do granito dos seus mosteiros, os seus hospitais de peregrinos, as súas numerosas igrexas, as súas casas señoriais e unhas prazas nas que o tempo escolleu quedarse detido.

Santiago de Compostela ocupa un punto achegado ao centro xeográfico de Galicia, no territorio máis setentrional e occidental de España.

A cidade, que se ergue a uns 260 metros sobre o nivel do mar, limita cara ao leste coas terras do interior galego polas que avanza, entre fértiles outeiros e unha arquitectura popular feita de pedra, o Camiño de Santiago. Cara ao oeste achégase ao litoral atlántico, que se abre a só 30 quilómetros. Unha liña recta imaxinaria trazada até a costa faría de Santiago un punto medio entre as Rías Baixas e as Rías Altas, que lle engaden un paisaxe veciño de praias calmas e bravas, de portos de pescadores e naves de recreo, de rica gastronomía e lendas mariñas.